De librerías por Vigo adiante

Hai xa tres anos que os lectores máis pequenos de Rodeira saíron coas profes encargadas do club de lectura a mercar libros nas librerías de Cangas. Eles e mais nós, as profes que os acompañamos, temos un gratísimo recordo daquela actividade pese ao mal tempo que tivemos que sufrir e os paraugas que tivemos que desbotar. E foi por iso que nos animamos a repetir actividade pero dándolle un aire diferente: visitar librerías especializadas.

Tiñamos moitas ganas de irmos á librería BD, a librería de Melo, o noso asesor en materia de  banda deseñada. E alá fomos.

Tamén pensamos en  visitar  unha librería especializada en texto literario cuns libreiros especializados en asesorar a súa clientela, e por iso escollimos  Versus.

Para rematar o percorrido, unha librería especializada en libro galego e portugués,  Andel , ideal para o noso grupo lector de libro en galego.

E velaquí o resultado das nosas compras polas tres librerías de Vigo que visitamos.

Podemos dicir que o éxito foi rotundo, o trato inmellorable e mesmo o tempo nos acompañou: espléndido día de sol para atravesar as ruidosas rúas de Vigo.
Sen dúbida, cómpre repetir, non si?