12.12.14

Alumnado de Rodeira xa viu "A esmorga"

Fai xa un par de semanas que se estreou nos nosos cines, con enorme éxito, a versión cinematográfica d´ A Esmorga, dirixida impecablemente por Ignacio Vilar. Nela reprodúcese a inesquecible historia que alá por 1959 publicaba no exilio Eduardo Blanco Amor e na que se narran, de boca do Castizo (interpretado por Miguel de Lira), as  vintecatro horas de troula e borracheira que este vivira co Bocas (interpretado por Karra Elejalde), e o Milhomes  (interpretado por Antonio Durán “Morris”). Son, porén, vintecatro horas nas que estes tres personaxes se introducirán nun circulo vicioso de perdición, nun cerco que se vai pechando, mentres recorren a cidade de Auria. A xenialidade do escritor permite mostrar, por medio dunha historia de aparente diversión, todo unha realidade de inxustiza e sordidez, que reproduce con gran mestría Vilar, introducindo paseniño o espectador nese abismo que vai engulindo os protagonistas. Isto, combinado coas actuacións impecábeis dos tres actores protagonistas, dá como resultado unha película que, dende logo, non deixará indiferente a ninguén.  Altamente recomendable.
O xoves, 18 de decembro,  os alumnos do Instituto terán a oportunidade de ir vela co centro. 

Ver trailer da película.

                                                                                       

IRIA GONZÁLEZ ESCOLAR-2ºbac-D

No hay comentarios: