O Vaidelibros despídese en Betanzos

Este ano acordamos rematar as sesións do Vaidelibros 2018/19 en Betanzos. Por que Betanzos para ler Poetízate? Pois porque é unha fermosa vila cargada de historia e beleza onde se pode disfrutar da beleza dos poemas que recolle a boísima antoloxía de Fran Alonso. E ademais tiñamos un dos mellores guías para acompañarnos: o compañeiro Salvador Castro que coñece moi ben a zona e que gusta de ofrecer o seu coñecemento de xeito desinteresado.

Iniciamos o percorrido no mosteiro de Caaveiro, onde tivemos visita guiada por guia local, seguimos pola vila de Betanzos percorrendo as súas rúas máis importantes, as portas medievais da vila, as prazas para deseguido ir comer a un restaurante previamente contratado. Despois do xantar visitamos as tres igrexas máis importantes: A nosa señora do Azogue, igrexa de San Francisco (co túmulo do señor de Andrade -entroutras marabillas-) e a igrexa de Santiago. No lateral desta paramos a facer as lecturas.

Este era o quinto ano dende que comezaramos en Rianxo os roteiros literarios do Vaidelibros. Celebramos pois, aos postres do rico xantar que nos serviu un restaurante da vila (Mesón Vega) , o quinto aniversario destas saídas que sempre teñen resultado moi gratas, amenas e propicias á lectura (deber que nunca excusamos).